Кыргызстандагы коронавирус

COVID-19: Кыргызстанда абал курч image

7 Июль, 2020 428

Президент Сооронбай Жээнбеков 6-июлда өткөн Коопсуздук кеңешинин жыйынында Республикалык штабга облустар аралык транспорт каттамдарын токтотуу маселесин карап чыгууну сунуштады. Ал ортодо баш калаадан тышкары аймактарда да эпидемиологиялык абал курчуй баштаганы айтылууда.

Июнь айынын 15инен бери антирекорд бир нече жолу жаңыланып, коронавирус жугузуп, өпкөсү сезгенип ооругандар көбөйдү. Бишкектеги ооруканалар толуп, медициналык кызматкерлер өздөрү да коронавирус жугузуп, аймактардан дарыгерлер менен медайымдар жардамга келди.

Ушу тапта шаарда ачылган күндүзгү стационарларда медиктерге жардам берип жаткан ыктыярчылар коргонуучу кийимдер, беткап жана колкап жетишсиз болуп жатканын билдиришүүдө.

«Ыктыярчыларга жеке коргонуу каражаттары жетишсиз болууда. Дарыгерлерге бир аз берилип жатат, бирок кийинки күндөргө керек болгондуктан алар кайра эле дароо сурап жатышат», — деди ыктыярчы Айдана Оторбаева.

Ал бул видеону көргөндөн кийин башка кыргызстандыктар да ыктыярчыларга жардам беришет деп үмүттөнүп жатканын кошумчалады.

Саламаттык сактоо министрлиги Бишкекте эле ар бир үчүнчү медик ооруп жатканын билдирди.

«Бишкекте кошумча 2062 койка ачылды. Алардын 69у интенсивдүү терапия палаталары. Орундар бошор замат дароо толуп калып жатат. Жардамга муктаждар көп», – деди саламаттык сактоо министринин орун басары Мадамин Каратаев.

Эгерде ката тапсаңыз, текстти белгилеп Ctrl+Enter басыңыз