http://ktrk.kg/Жумгалдагы шамал менен жаандын кесепетинен турак жайлар жабыркады

Жумгалдагы шамал менен жаандын кесепетинен турак жайлар жабыркады

3 Июнь , 12:07 376

Эгерде текстте ката тапсаңыз, белгилеп Ctrl+Enter басыңыз

Жумгалда турак жайлардын короолорун суу каптады. Алдын ала маалымат боюнча кечээ саат 18:30 чамасында жаап өткөн жамгырдын кесепетинен Нарын облусунун Жумгал районундагы Чаек айылында каналдан суу ашып, Кашка-Терек жана Май-Кокту тилкесинде жайгашкан үйлөрдүн короолорун суу каптаган. 

Өзгөчө кырдаалдар министрлигинен билдиришкендей, жерине Жумгал райондук бөлүмдөн 20 куткаруучу жана кошумча айыл аймактан 2 жүктөгүч, 1 экскаватор тартылды. Ошондой эле кечээ кечинде Жалал-Абад шаарында ылдамдыгы секундасына 15-19 метрге жеткен шамал катталып, Көк-Арт кичи районунда жайгашкан №4 көп кабаттуу үйдүн 120 чарчы метр тунукесин жана Курманбек көчөсүндө жайгашкан №14 мектеп-гимназиясынын 160 чарчы метр чатырын учуруп кеткен. Жабыркагандар жок. 

Тогуз-Торо районунда да жаап өткөн жамгырдын кесепетинен арыктан суу ашып, Сары-Булуң айыл аймагынын Кара-Суу айылында ички чарбалык көпүрөнүн асты жагын суу жеп кеткен. Табылгыты айылында 8 үйдүн жана Көк-Ирим айыл аймагынын Арал айылында 4 турак жайдын короолорун суу каптаган. Тартылган күчтөрдүн жардамында суунун нугун бурушкан, ал эми ички чарбалык көпүрөнү калыбына келтирүү иш-чаралары бүгүн жүргүзүлөт. Чаткал районунун Терек-Сай айыл аймагында катуу жааган жамгырдын кесепетинен Кызыл-Токой айылында Ала-Бука - Жаны-Базар - Кировка унаа жолунун 18-19-чакырым аралыктарын суу каптап, унаа жолду жана узундугу 2 миң метр сел өтүүчү каналды кум, шагылга толтурган. 2-июнь күнү айыл аймактан 1 жүктөгүч тартылган күчтөрдүн жардамында сел өтүүчү канал толугу менен тазаланды. 

Эскерте кетсек, буга чейин Кыргызгидромет борбору туруксуз аба ырайы тууралуу шашылыш билдирүү таркаткан.

Новости по дате